ILOILO – Ginpatigayon ang championship sang National Basketball Training Center League sa banwa sang Buenavista, Guimaras.
Sa interview sang Bombo Radyo kay Richard Gabayoyo, Commisioner sang National Basketball Training Center League sa probinsya sang Guimaras, iya ginpahayag nga ang NBTC amo ang isa ka pamaagi agud matukiban ang talento sang kabataan sa patag sang Basketball.
Naghampang sa championship ang Buenavista National High School kag Dr. Catalino Gallego Nava sang San Lorenzo, Guimaras.
Nagpangibabaw ang Buenavista National High School kag sila ang magatiglawas sa probinsya sang Guimaras sa Regional National Basketball Training Center League nga hiwaton sa palaabuton nga Pebrero 2020.
Dako naman nga dungog para sa Buenavista National High School nga sila ang napilian nga magatiglawas sa probinsya sang Guimaras.
Sa interview sang Bombo Radyo kay Jay David Gallo, atleta sang Buenavista National High School, nagapasalamat siya sa kahigayunan nga itiglawas ang probinsya sang Guimaras kag amo man sa suporta sang mga Guimarasnon.
