ILOILO CITY – Ginpaidalom na sa state of calamity ang Northern Samar kasunod sang wala untat nga pagbubo sang ulan nga nagresulta sa pagbaha kag pagkaguba sang agrikultura kag imprastraktura.
Ini ang gin-anunsiyo ni Governor Edwin Ongchuan kasunod sang rekomendasyon sang Provincial Disaster Risk Reduction and Management Council.
11 sa 24 ka mga banwa sa Northern Samar ang apektado sang lapnagon nga baha nga nag-apekto sa probinsya bangud sang mabaskog nga pagbubo sang ulan humalin pa sang nagligad nga semana.
Ini ang ginalakipan sang Mondragon, Lapinig, San Roque, Bobon, Catubig, Laoang, Las Navas, Catarman, Lope de Vega, Pambujan, kag Palapag.
Nagapadayon pa suno sa otoridad ang rescue operations sa mga residente nga na-trap bangud sa baha.
Sa data sang Police Regional Office 8, 91 ka mga barangay ang apektado sang baha nagikan sa 10 ka mga banwa.
Padayon pa nga ginatumod ang mga apektado nga barangay sa Palapag.
Sa data sang otoridad, nagdangat na sa kabug-usan nga 5,617 ka mga pamilya nga ginabug-usan sang 27,498 ka mga indibidwal ang nagpadulong sa mga evacuation centers.
Ang ini nga numero ang ginalauman nga magasaka pa bangud padayon ang rescue operations sa pila ka mga lugar kaangay sang Catarman, Palapag, kag Lope de Vega.
Samtang, pila naman ka mga national road sa probinsya ang indi maagyan bangud sa pagbaha.
Sa Eastern Samar naman, padayon nga naga-apekto ang baha sa banwa sang Jipapad.
Tanan nga 13 ka mga barangay sa banwa ang lubog sa tubig baha humalin sang Lunes sang aga.
Ang local government unit sang Jipapad ang nag-deklarar na sang state of calamity.
