Nakabalik na sa Pilipinas si President Ferdinand “Bongbong” Marcos Jr. halin sa pagtambong sini sa commemorative summit sang 50th Anniversary sang relasyon sang Japan kag Association of Southeast Asian Nations (ASEAN).
Sa iya pagbisita sa Tokyo, nagpakigkita si Marcos kay Japanese prime minister Kishida Fumio kag iban pa nga mga lideres sa Southeast Asia.
Lakip sa dalagku nga accomplishments sang presidente sa tatlo ka adlaw nga byahe amo ang ang siyam ka investment commitments nga nagabalor sang ginabanta P14.5 billion.
Suno sa Presidential Communications Office (PCO), ini nga investments ang ginapanan-aw nga makahatag sang 15,750 ka mga job opportunities para sa mga Pinoy diri sa pungsod.
Ini nga pledges ang makabulig sa industriya sang imprastruktura, business process outsourcing (BPO), retail, kag electronics and ship manufacturing.
Sa Creative and Sustainable Economy through Innovation Event nga gin-organisa sang Department of Trade and Industry, may speech man si Marcos nga amo ang nagpadayaw sang collaborative projects sang Filipino fashion designers kag Japanese textile manufacturers.
May yara man sang duha ka Memoranda of Cooperation: isa amo ang sa tunga sang Department of Environment and Natural Resources kag Ministry of the Environment of Japan sa patag sang Environmental Protection.
Ang isa pa amo ang nagapabakod sang kooperasyon sa tunga sang coast guards sang Pilipinas kag Japan.
Nagtambong man ang presidente sa Asia Zero Emissions Community ukon ang AZEC Leaders meeting kun sa diin ginplastar sini ang mga inisyatibo sang Pilipinas agud makasaylo kag maka-promote sang matinlo nga enerhiya.
