Gin-anunsyo sang Department of Agriculture (DA) nga indi ini mag-import sang bombay tubtub sa bulan sang Mayo subong nga tuig bangud sa bastante pa nga suplay sini diri sa Pilipinas.
Suno kay Agriculture Secretary Francisco Tiu Laurel, mahimo nga palawigon pa tubtub sa Hulyo ang suspensyon kun magpadayon nga malikupan sang suplay ang demand sa amo nga produkto.
Nahibaluan nga nagnubo na sa P50-P70 kada kilo ang farmgate price sang bombay kag posible pa nga magpanaog sa Pebrero kun mas madamo pa ang ma-harvest.
Sa Nueva Ecija kun sa diin ginakuha ang 97% sang produksyon sang bombay sa Luzon, yara na gid lamang sa P20 ang kada kilo. Ang Luzon amo man ang naga-produce sang 65% sang local onion supply sa pungsod.
Tuman ini kanubo ipaanggid sa record-high nga P720-kada kilo nga presyo sang bombay sang Disyembre 2022 bangud sa puraot nga suplay.
Nagpahayag ang Department of Agriculture nga posible nga maga-import liwat ang pungsod kun maapektuhan sang El Niño ang suplay.#
