Ginatindugan sang Department of Social Welfare and Development (DSWD) ang pahayag sini nga mas practical ang paghatag sang cash grants sa mga benepisyaryo sang Pantawid Pamilyang Pilipino Program (4Ps) sa baylo nga hatagan sila sang bugas.
Giklaro ini ni Social Welfare Assistant Secretary for strategic communications Romel Lopez bilang reaksyon sa ginaduso sang Department of Agriculture (DA) nga i-convert na lang ang P600 monthly rice subsidy sa aktwal gid nga bugas kag amo ang ihatag sa 4Ps.
Sa plano sang DA, ang bugas ang igasuplay sang National Food Authority (NFA).
Suno naman kay Lopez, nakapakigkita na sila sa DA kag ila ginklaro nga indi feasible ang proposal sang amo nga ahensya bangud sa logistical requirements nga posible mabudlay para sa mga benepisyaryo sang programa.
Ginpahayag man sini nga wala sang probisyon sa General Appropriations Act nga dapat magbakal sang bugas gani wala sang legal cover kag indi na kinahanglan pa ang diskusyon sa National Advisory Council.
Ang 4Ps amo ang flagship program sang DSWD kag may yara sang 4.4 million household-beneficiaries sa bilog nga pungsod.#
