ILOILO CITY- Nagdepensa ang alkalde sang Dumangas, Iloilo may kaangtanan sa overpriced nga mga heavy equipment nga ginprocure sang banwa.
Sa interview sang Bombo Radyo kay Mayor Ronaldo ‘Onal’ Golez, iya ginpahayag nga ini ang nag-agi sa husto nga proseso kag public bidding.
Suno kay Golez, ang pinakamaayo nga himuon amo nga hulaton na lang ang pag-abot sang nasambit nga mga equipment kag ipa-validate sa Commission on Audit ang mga specifications agud mahibaluan kon may yara gid man sang overpricing.
Matandaan nga ginbuyagyag ni Sangguniang Bayan Member Ian Dolendo nga kon sumahon ang presyo sang ginprocure nga equipment sa kompaniya nga AVANTRAC nga nakabase sa Cebu nga nagdaog sa bidding, nagalab-ot tanan P45M ang balor sang duha ka brand new 6-wheeler dump truck, isa ka brand new nga 6-wheeler garbage compactor, isa ka brand new nga 4 by 4 backhoe loader, isa ka brand new nga 6-wheeler mini dump truck, kag isa ka brand new nga generator set.
Apang kon presyo naman sang HOWO/HOMAN kag SINOTRUK/LONKING ang basehan, nagalab-ot lang ini sa kapin P11.5M.
Paathag naman ni Golez kon ngaa ang kompaniya sa Cebu ang napilian nga mangin supplier apisar nga ang iban nga kompaniya nga nagpsakop sa bidding ang naka-base lang sa Iloilo, ini bangod nga indi man mahimo nga magpatigayon sang direct purchase ang banwa.
Suno pa sa iya, kon overpriced ang nasambit nga mga equipment, pat-od nga indi man ini pagtugutan sang Development Bank of the Philippines nga amo ang nagpautang sa LGU- Dumangas para sa pagprocure sang mga equipment.
Dugang pa sang alkalde, mahimo nga wala lang mahangpan sang iban nga opisyal sang banwa ang proseso sang pagprocure sang nasambit nga mga equipment sa diin ang Sangguniang bayan mismo ang naghatag sang otoridad sa pagbakal sang nasambit nga mga trucks.
Wala naman ginadula ni Golez nga may lamod politika ang motibo sa likod sang pagpagwa sang amo nga isyu.
Suno sa iya, nahangpan niya nga tanan ang may ambisyon para sa mas mataas nga posisyon ilabi na ang mga end-termer na.
