ILOILO CITY – Maga-agi sa maid-id kag husto nga proseso ang pag-review sang Terms of Reference sang Public Private Partnership may kaangtaan sa pagkaayo sang Iloilo Terminal Market kag Iloilo Central Market.
Ini ang ginpasalig ni Iloilo City Councilor Ely Estante, Chairman sang Committee on Markets and Slaughterhouse, sa tunga sang pagpangduha-duha sang market associations nga madulaan sila sang pwesto sa merkado.
Suno kay Estante, sa pagbalay sang Terms of Reference, iga-review sang konseho ang resulta sang konsultasyon nga ginpatigayon sang Public Private Partnership council.
Magapatigayon sang kunsultasyon ang Public Private Partnership council sa Enero agud maplastar sa stakeholders ang preliminary evaluation kag kun may kasugtanan, igapasa ini sa Iloilo City Council nga amo ang magadesisyon sa paghatag awtoridad kay Iloilo City Mayor Jerry Treñas nga makapatigayon sang biding.
Magluwas diri suno kay Estante, ang Committee on Markets and Slaughterhouse ang magahimo man sang kaugalingon nga kunsultasyon sa market vendors agud masigurado ang mga benipisyo nga mahatag sang Public Private Partnership sa syudad sang Iloilo.
Nagapati naman si Estante nga mangin pabor sa syudad sang Iloilo kun madayon ang Public Private Partnership.
Suno kay Estante, madugay na nga ginakinahanglan sang syudad ang pagpakay-o sang mga nasambit nga merkado.
Gubaon na ang mga merkado suno kay Estante rason nga nga kalabanan sa mga customer ang nagabakal na lang sa mga mall.
