ILOILO CITY – Ginmandu ni Presidente Ferdinand Marcos Jr. ang pagtukod sang isa ka special panel of prosecutors agud nga magtutok sa kaso sang pagpamatay sa Negros Oriental.
Ini ang pahayag ni Justice Secretary Jesus Crispin Remulla matapos ang ginpatigayon nga meeting kay Marcos may kaangtanan sa sitwasyon sa nasambit nga probinsya.
Suno kay Remulla, ang panel ang bug-usan sang ‘skilled’ prosecutors.
Una na nga ginpahayag ni Remulla nga na-obserbaran sang pila ka mga opisyal nga may “pattern of impunity” sa Negros Oriental matapos ang pagbisita sa haya ni Negros Oriental Governor Roel Degamo.
Ang “impunity” amo ang kapaslawan sang gobyerno nga mahatagan sang hustisya ang ano man nga sahi sang krimen nga natabo sa isa ka lugar.
Suno kay Remulla, gindmandu ni Marcos nga ma-stabilize kag ma-resolve ang sitwasyon sa Negros.
Dugang pa sang tiglikom, madamo na sang natumod nga persons of interest sa mga krimen nga nakomiter kag na-istoryahan man ang pagpasaka sang kaso.
Siyam ka murder charges, 15 ka frustrated murder charges, kag tatlo ka attempted murder charges ang natalana nga ipasaka sa mga indibidwal nga responsable sa krimen.
Sang nagligad nga semana, gin-raid sang otoridad ang mga balay nga ginapanag-iyahan ni Negros Oriental Representative Arnolfo “Arnie” Teves Jr. bangud sa indi lisensyado nga mga armas.
Ini ang ginpatigayon matapos ginbuyagyag sang mga arestado nga suspek nga isa ka “Cong Teves” ang nagmandi sa pagpatay kay Degamo.
Ginklaro ni Remulla nga may yara sang briefing nga ginapatigayon antes ginakasa ang raid kag ginapasiguro nga ginasunod ang layi sa mga tikang nga ginahimo.
Pahayag naman ni Atty. Ferdinand Topacio, lead counsel ni Teves, nga wala sang kaso nga ginpasaka batuk sa iya kliyente may kaangtanan sa kamatayon ni Degamo.
Apang ang kongresista ang nagapangatubang sang kaso may kaangtanan sa 2019 killings kun sa diin, gintudlo ini nga mastermind.
Si Teves naman ang wala pa nakapauli sa Pilipinas bangud sa security concerns suno kay House Speaker Martin Romualdez.
Kung madumduman, si Degamo upod sa walo ka iban pa ang napatay matapos gin-assassinate sang Marso 4.
Ang Philippine Army ang nag-deploy na sang mas madamo nga mga personnle sa Negros Oriental kasunod sang kamatayon ni Degamo agud nga mabantayan ang pila ka bahin sang probinsya samtang nga nagapadayon ang paglagas sa mga iban pa nga suspek.
Ang Philippine National Police naman ang maga-imbestigar sa kun bala, ang mga police security nga naka-detail kay Degamo ang hungod nga nag-absent sang adlaw nga ini ang ginpatay.
