ILOILO – Ginsapol ni Iloilo Governor Arthur Defensor Jr. ang Dingle-Pototan Water District kag si Pototan Mayor Rafael Lazaro agud mapangitaan sang madasig nga paagi nga masuplayan sang bastante nga tubig ang Iloilo Provincial Hospital.
Ini ang may kaangtanan sa nagapadayon nga expansion sa amo nga ospital sa banwa sang Pototan.
Sa interview sang Bombo Radyo kay Defensor, iya ginpahayag nga ginakabig niya nga immediate concern ang problema sa tubig sa talatapan bangud 150,000 cubic meters per month kuntani ang kinahanglanon nga suplay, apang sa subong, 95,000 cubic meters lang ang masuplay sang water district.
Suno sa gobernador, may mga option nga naplastar kun sa diin ginpahayag nga may yara sang proyekto ukon water source sa Barangay Igang sa amo nga banwa nga mahimo malinyahan sang ospital.
Naumpisahan na ini suno sa iya kag i-test pa ang kapasidad.Magluwas diri, may ginadevelop man subong nga water source sa Barangay Dapitan sa amo man nga banwa kag sarang man makadugang sa water capacity sang water district.
Mahimo man suno kay Defensor nga makabakal sang tubig sa bulk water supplier ukon posible man nga magdevelop sang isa pa ka water source sa Barangay Tinocuan, Dingle apang ini ang nagakinahanglan sang mas daku nga kantidad.
