Ginkumpirma sang Philippine National Police (PNP) nga may isa ka police officer nga nalakip sa 18 nga kumpirmado nga patay matapos naglugdang ang isa ka roll-on/roll-off (RORO) ferry vessel sa Pilas Island, Basilan sang Lunes sang kaagahon.
Suno sa PNP, ang biktima nga pulis ang na-assign sa Regional Mobile Division Unit 9.
Nagpabutyag naman sang kasubo si PNP acting chief Police Lieutenant General Jose Melencio Nartatez Jr. kag nagpalab-ot man sang simpatiya sa pamilya sang biktima. Ginpasalig sini nga magahatag ang pwersa sang kapulisan sang bulig.
“Masakit at mabigat para sa buong PNP ang pagkawala ng isa sa ating mga kasamahan. We extend our deepest condolences to the family. Sisiguraduhin namin na hindi sila nag-iisa sa panahong ito,” suno kay Nartatez.
Suno pa sa PNP, 13 ka mga police personnel ang na-rescue kasunod sang paglugdang sang M/V Trisha Kerstin 3.
Siyam sa ila ang nagikan sa 905th kag 903rd Maneuver Companies sang Regional Mobile Force Battalion 9 kag apat naman ang nagikan sa Regional Emergency and Rescue Unit 9.
Gindala ang na-rescue nga mga personnel sa Zamboanga City Port kag sa Basilan Port para sa nagakaigi nga pagtatap.
Sa latest update sang awtoridad, 317 ang na-rescue kag 18 ang napatay sa trahedya nga natabo ala una sang kaagahon sang Lunes, Enero 26. Sa karon, 24 pa ang missing.#
