Nakumpleto na sang Tubungan Municipal Police Station ang mga dokumento sa ipasaka nga panumbungon batok sa suspek nga nagpatay sa 18-anyos nga dalaga nga si Candie Tabanda sa sulod mismo sang iya hulot sa ila balay sa Barangay Ingay, Tubungan, Iloilo.
Sa interview sang Bombo Radyo kay Police Captain Alberto Manguilimotan, Jr., hepe sang Tubungan Municipal Police Station, iya ginpahayag nga reklamo nga Rape with Homicide ang atubangon ni Aljohn Jalbuna, 33, residente man sang Barangay Ingay sa amo nga banwa.
Natipon na suno sa hepe ang mga ebidensya kag mga pahayag sang mga testigo sa krimen, apang sandig sa ila pagpakig-angot sa piskal, gin-schedule ang pag-file sang reklamo buwas sa aga, Hunyo 23.
Bisan buwas pa ang filing, indi man sini maapektuhan ang pag-detain sa suspek.
Suno sa natungdan, base sa dalagan sang imbestigasyon subong, isa lang ang suspek sang ginhimo sini ang krimen.
Matandaan nga nag-ako ang suspek sa pagsulod sa kuwarto kag pagpatay sa dalaga, apang todo-panindugan ini nga wala niya ginhimuslan ang biktima.
Baliskad ini sa nagguwa nga resulta sang autopsy sa lawas sang biktima kun sa diin nakumpirma nga ini ang gin-abuso seksuwal.
Naggwa man sa autopsy nga multiple traumatic injury at the head ang kabangdanan sang kamatayon sang dalaga bangud sa mga nakit-an nga mga lagob sa iya ulo nga posible tuga sang pagsumbag ukon ginbunggo ini sa matig-a nga bagay.
Nagaguwa man sa pagpangusisa sang Bombo Radyo sa barangay nga may record man si Jalbuna sa pagpangawat sang baka sa ila lugar. Ginatudlo man ini nga nagsulod anay sa isa ka balay kun sa diin may yara sang menor de edad, apang sang amo nga tion, wala ini napasakaan sang kaso.#
