Ginalantaw sang administrasyon ni President Ferdinand Marcos Jr. nga magpaguwa sang P2-billion nga ayuda sa rice retailers nga mahimo mapierde bilang resulta sang price cap.
Epektibo subong nga adlaw, Septyembre 5, ang P41 per kilogram nga price cap para sa regular-milled rice kag P45 per kilogram para naman sa well-milled rice kasunod sang mandu ni Marcos nga amo man ang tiglikom sang Department of Agriculture (DA).
Suno kay House Speaker Martin Romualdez, nagpakig-angot na ang Kamara partikular si House Appropriations Committee Chairperson Zaldy Co sa Department of Budget and Management (DBM) agud nga may kuhaan sang P2 billion nga pondo.
Ginpasalig man ni Romualdez nga magasapol siya sa mga lider sang rice retailers subong nga semana agud nga mabatian ang ila dugang nga problema sa ila nga income.
Suno naman kay Marcos, magahimo ang DA kag ang Department of Trade and Industry (DTI) sang listahan sang retailers kag ang kita nga ila mapierde bangud sa price cap.
Suno naman sa Department of Social Welfare and Development (DSWD), gamiton subong sang ahensya ang sustainable livelihood program—nga amo man ang programa nga gingamit sang gobyerno nga buligan ang magagmay nga mga negosyo sa tion sang lockdown bangud sa pandemya. #
