ILOILO CITY – Nagpaandam si Senate President Juan Miguel Zubiri may kaangtanan sa posible ‘exodus’ sang mga Pilipino agud nga magpangita sang mas maayo nga opurtunidad sa iban nga pungsod sa tion nga indi sa gihapon makadesisyon ang Congress nga magpasar sang legislated wage increase para sa mga mamumugon.
Suno kay Zubiri, may yara sang duha gid lamang ka pilian: pasakaan ang sweldo sang mga mamumugon ukon tan-awon na lamang ang pagbiya sang mga ini sa pungsod agud nga magpangita sang trabaho nga may mataas nga sweldo.
Pahayag niya, ang minimum daily wage sang mga mamumugon sa National Capital Region ang halos pareho sa basic hourly pay sang mga empleyado sa Estados Unidos.
Dugang pa niya, kinamatarong sang mga trabahador ang mataas nga sweldo bangud nga kun indi tungod sa ila, magasirado ang mga industriya kag malupog ang ekonomiya sang pungsod.
Ginpasalamatan man niya ang Trade Union Congress of the Philippines sa pagsuporta sa hagna nga iya ginpasar nga nagaduso sang P150 across-the-board increase sa daily rate sang mga workers sa pribado nga mga kompaniya.
