Nagpangayo sang pasaylo ang pinuno sang compliance team sang Iloilo City Government kasunod sang paglapas sa health protocol matapos nagpaidalom sa swab test.
Matandaan nga sa Facebook post ni Fernando Jose ‘Boyet’ Rico, iya ginpost ang mga tinaga nga ‘lunch after swabbing’.
Ang amo nga post ang kasunod sang pagpaidalom sa swab test sang mga empleyado sang Iloilo City Hall matapos nagsaka ang COVID-19 cases sa nasambit nga talatapan.
Sa interview sang Bombo Radyo kay Rico, pinuno sang compliance team sang Iloilo City Government kag Executive Asssistant for Barangay Affairs, iya ginpahayag nga bag-o siya nagpanyaga kaupod ang pila ka staff sang Iloilo City Hall, nagpatigayon sila sang mass testing sa Iloilo Freedom Grandstand.
Una nga ginpaidalom sa swab testing ang mga empleyado nagikan sa pila ka opisina sang Iloilo City Hall kag ginpaulihi ang mga compliance officers.
Suno kay Rico, ginabanta la 1:45 na sang hapon natapos ang ila nga mass testing sa diin nakaeksperyensya siya sang pagkurog tuga sang kagutom kag kauhaw.
Ginpahayag ni Rico nga matapos sini, didto kag nagpadulong siya lakip na ang pila ka mga kaupdanan niya sa Iloilo City Hall sa isa ka restaurant kag nag-inom sang softdrink kag nagkaon sang panyaga.
Depensa niya, halos wala man tawo ang restaurant nga ila ginkan-an magluwas sa mga waiter.
Pagpauli ni Rico, didto na siya nagkatyempo kag nagpost sa iya social media account.
Gin-ako man sang natungdan ang iya kapaslawan bangud gin-una sini ang iya lawas sang nakabatyag sang gutom kag nalipatan ang protocol matapos nagpaidalom sa swab test.
Nakahanda man si Rico nga batunon ang tanan nga konsekwensya kag ginpasalig nga ubrahon niya ang iya katungdanan bilang compliance officer sang mas maayo.
