ILOILO – Ginadayaw sang Simbahang Katolika ang hagna nga ginduso ni House Minority Leader Bienvenido ‘Benny’ Abante Jr. nga himuon nga mandatory ang bible reading sa pampubliko nga elementary kag high school sa pungsod.
Nahibaluan nga sa House Bill 2069, ginduso ni Abante nga hatagan sang tion ang pagpabasa sang bibliya bangud nga nagapati siya nga makahatag ini sang daku nga bulig agud magiyahan ang mga estudyante kag mas mapalapit sa Ginuo.
Sa interview sang Bombo Radyo kay Rev. Father Wilson Capellan, OSA, iya ginpahayag nga maayo ini nga programa para sa mga kabataan apang nagapati siya nga nagakinahanglan man nga tahuron ang tagsa ka opinyon kag pagtuo sang mga estudyante kasubong sa nangin pahayag sang
Department of Education 6 nga nakadepende sa tagdumalahan sang ekswelahan ang pagpatuman sini.
Suno kay Capellan, indi mahimo nga piliton ang mga estudyante nga magbasa sang bibliya bangud nga may tagsa sila ka pagpati kag opinyon.
Ginpahayag ni Capellan nga mas maayo kun giyahan lang nga magbasa sang bibliya ang mga estudyante sa baylo nga himuon ini nga mandatory.
