Patay ang siyam ka ginapatihan mga katapo sang New People’s Army (NPA) sa operasyon sang militar sa Malaybalay City sa Bukidnon kadungan mismo sang Paskuwa, Disyembre 25.
Sa statement sang Philippine Army’s 4th Infantry Division (4ID), nakasaad nga nagpatigayon ini sang mga opensiba sa mga rebelde sa kabarangayan nga Can-ayan, Kibalabag, Kulaman, kag Mapulo kahapon sang kagaahon.
Walo ka mga armas-luthang ang nakumpiskar sa amo nga operasyon. Wala man sang gin-report nga patay sa tropa sang gobyerno sang ginpatigayon ang opensiba.
Natabo ini nga encounter sa una nga adlaw sang pagsugod sang duha ka adlaw nga ceasefire nga gin-deklarar mismo sang Communist Party of the Philippines (CPP).
Ini nga ceasefire suno sa komunista ang mangin epektibo halin kahapon tubub subong nga adlaw bilang obserbasyon sa ika-55 nga founding anniversary sang CPP.
Matandaan nga wala naman sang ceasefire nga gindeklarar ang bahin sang militar kag mga pulis.
Nagpasalig naman ang Armed Forces of the Philippines (AFP) nga nagapabilin nga alerto ang militar sa posible pagpang-atake sang mga rebelde nga grupo apisar sang ceasefire.
Suno kay Public Affairs Office chief Col. Xerxes Trinidad, isa ka “empty statement” ang deklarasyon sang komunista nga grupo.
Pahayag pa sini, nagakabuhas na ang mga hinganiban sang mga rebelde, nagakadulaan na sila sang supporters, kag nagaluya na ang ila kapasidad sa pag-atake.
Apisar sini, wala nagakumpyansa ang tropa sang gobyerno suno pananglitan may matabo nga harassments subong nga anibersaryo pa sang amo nga grupo.# (image from philippinerevolution.info/)
