ILOILO CITY – Umpisahan na sang Iloilo City Government ang pagkakas sang mga spaghetti wires sa syudad.
Suno kay Iloilo City Mayor Jerry Treñas, unahon sa pagkuha ang mga spaghetti wires sa mga dalanon nga agyan sang patigayunon nga Dinagyang festival 2020.
Suno sa alkalde, ini agud mapat-od ang katahum sang syudad sa mata sang mga tawo.
Kuhaon man suno kay Treñas ang mga surplus kag nagadoble nga poste sa nagkalain-lain nga distrito sa syudad.
Nahibaluan nga una na nga ginhatagan ni Treñas sang plaso ang Panay Electric Company (PECO) kag telecommunication companies nga kuhaon ang nagalapta nga kable sang ila kuryente antes ang Disyembre 31.
Nagapasamat man ang alkalde bangud yara na sa pwesto si Engr. Randy Pastolero, executive assistant for power, sa pagbulig sa paghimos sang mga poste kag spaghetti wires nga nagasabad sa dalanon.
