ILOILO CITY- Indi magsugot ang Iloilo City Government sa tion nga maghingyo ang Panay Electric Company (PECO) sang tax amnesty sa P98 million real property tax nga balayran sini sa syudad.
Sa interview sang Bombo Radyo kay Iloilo City Mayor Jerry Treñas, iya ginpahayag nga indi makapanubo ukon makahatag sang ‘discount’ ang syudad bangud ang presidente lang ang may awtoridad sa paghimo sang amo nga lihok.
Suno kay Treñas, sa tion nga maglampas sa Disyembre 12 nga indi mabayaran sang PECO ang ginasukot sang syudad, wala na sang pagpangduha-duha nga kabigon ang amo nga pamunuan nga “delinquent taxpayer” kag igalakip ang ila propiedad sa patigayunon sang syudad nga auction sale.
Kabahin man sang iga-auction amo ang pipila ka mga mechanical machineries sang nasambit nga pamunuan.
Nahibaluan nga kapin 20,000 ka mga concrete kag wooden nga poste sang PECO ang mahimo madala sa tion nga mapaslawan ini nga makabayad.
Samtang, ginpahayag ni Treñas nga ila lang ginahulat ang mangin desisyon sang PECO nga nagpasalig man sa iya nga makahatag na sang desisyon ‘on or before’ Martes nga adlaw.
