Terorismo ang isa sa pinakamalala nga mahimo mangin resulta sang ginpatigayon nga airstrike sang Estados Unidos sa Baghdad, Iraq nga nagpatay sa isa sa pinaka-gamhanan nga heneral sang Iran.
Sa interview sang Bombo Radyo kay Mr. Ramon Casiple, Executive Director of Institute for Political and Electoral Reform (IPER) kag isa ka political
analyst, iya ginpahayag nga assymetrical war ang matabo sa diin,sa baylo nga magaatubangay ang duha ka pungsod, lain nga pamaagi sang giyera ang magaluntad.
Suno kay Casiple, global terrorism ang mahimo matabo sa diin posible nga magpasilabot ang mga pwersa nga kaalyado sang Iran.
Magluwas sa global terrorism, makabig nga “immediate” nga epekto man sang nangin lihok sang US amo ang pagtaas sang presyo sang gatong, kag realignment sang mga gamhanan nga pungsod sang Middle East.
Ginpaathag pa sang political analyst nga indi lamang ini US versus Iran kundi apektado man ang mga superpowers kaangay sang China, Japan, Britanya, European Union kag iban pa.
Apang suno sa iya, indi pa ini mangin mitsa sang world war 3 kag mahimo nga regional war gid lang ang matabo.
Sa pihak sini balantayan sa gihapon kun ano ang mangin tikang sang Iran sa masunod nga mga inadlaw.
