Nagtimbuok pa sa P14.51 trillion ang utang sang Pilipinas sa katapusan sang Nobyembre 2023 kasunod sang pagsaka sang lokal nga mga hinulaman sang pungsod.
Base sa data nga ginpaguwa sang Bureau of the Treasury, ang record-high nga debt balance sang Pilipinas sa katapusan sang Nobyembre ang 0.19% nga mas mataas ipaanggid sa P14.48 trillion nga na-rekord sa katapusan sang Oktubre 2023.
Sa sini nga utang, daku gid ang lokal nga hinulaman nga P10.02 trillion ukon yara sa 69.09% samtang P4.48 trillion ukon 30.91% naman ang nahulam sa iban nga mga pungsod.
Nahibaluan nga kun balikan ang rekord, sobra sa doble ang dugang sang utang sang Pilipinas sa nagligad nga pito ka tuig bangud sang pagpondo sini sang big-ticket infrastructure projects kag paghatag man sang pondo para sa pandemic response.
Sa pihak nga bahin, nagnubo naman sa 60.2% ang debt-to-gross domestic product ratio sa third quarter halin sa 61% sa second quarter.
Buot silingon, kun manubo ang debt-to-GDP ratio, mabayaran sang isa ka pungsod ang utang sini nga wala sang matuga nga tuman ka daku nga impact sa ekonomiya.
Sa idalom sang Medium Term Fiscal Framework, nakasaad nga tuyo sang gobyerno nga mapanubo pa sa 60% ang debt-to-GDP ratio sang Pilipinas sa 2025 kag panubuon pa gid sa 51.1% sa 2028.#
