ILOILO CITY— Hugot nga pangamuyo kag paglaum nga mabuhi para sa iya mga anak ang ginsandigan sang isa sa mga survivor sang nagkulob ang MB Jenny Vince.
Sa interview sang Bombo Radyo kay Rocill Garcia, 32, sang Guimaras, iya ginpahayag nga wala siya nadulaan sang paglaum nga makaluwas sa trahedya bangud iya ginpanumdum nga may yara pa siya sang tatlo ka mga kabataan nga nagahulat sa iya agud makapauli.
Suno kay Garcia, maayo ang tiyempo sang sila ang naghalin sa Buenavista Wharf rason nga ginpasugtan sila magbyahe.
Sang nakaabot na sa tunga sang lawod ang pumpboat, didto na kag hinali lang nag gal-om, nagbubo ang ulan kag nagbaskog ang hangin.
Ginpahayag ni Garcia nga malapit na lang sila nga makadungka sa Parola Wharf apang nagkulob ang pumpboat.
Nagahilibion man si Garcia samtang ginasaysay ang iya naagyan sa diin halos isa pa ka oras antes sila naluwas sang rescue team.
Dugang pa ni Garcia, nakainom siya sang krudo kag asayti sang pumpboat kag sang nag-abot na ang rescue team, didto na kag nakasuka siya sang iya naimom nga krudo kag asayti bag-o nalipong.
Ginpasalamatan man sang natungdan ang Ginoo bangud nahatagan siya sang kahigayunan nga mabuhi liwat kag makaupod ang iya pamilya.
