Nagalaum ang isa ka retired police nga tumandok sang Guimbal, Iloilo kag subong yara na sa United Kingdom nga maka-avail man siya sang bakuna para sa COVID-19 subong nga Disyembre.
Suno kay Bombo International Correspondent Wilson Gilpo, 62 anyos na siya kag diabetic gani antes siya magpauli kag magbakasyon sa Guimbal, kuntani suno sa iya mahatagan man siya sang Pfizer vaccine.
Si Gilpo ang kapin 15 anyos na nga nagatinir sa amo nga pungsod kag subong isa ka deputy house manager sa isa ka private residential building sa Central London.
Suno kay Gilpo, maswerte sila nga United Kingdom ang labing-una nga pungsod sa bilog nga kalibutan nga nakagamit sang Pfizer vaccine matapos nga gin-aprubahan ini sang mga regulators sang nagligad nga semana.
Kahapon nga adlaw, gin-umpisahan ang immunization campaign kun sa diin 800,000 doses ang ginpanagtag sa mga ospital kag bastante para sa 400,000 ka tawo.
Ang labing-una nga nag-avail sang bakuna amo ang 90 anyos nga British woman nga si Margaret Keenan kag ini ang iya ginakabig nga “best early birthday present” bangud kaadlawan niya sa masunod nga semana.
Sentro man subong sang atensyon ang Pinay nurse nga amo ang nagpatigayon sang injection.
Ang Filipina nurse amo si May Parsons nga 24 anyos na nga nagtrabaho bilang nurse.
Suno kay Gilpo, tubtob sa apat ka milyon ka doses sang Pfizer/BioNTech vaccine ang ginalauman nga mapanagtag antes matapos ang 2020.
Unahon sa pagbakuna ang mga vulnerable nga mga pumuluyo ilabi na ang naga-edad sa masobra 80 anyos kag amo man ang mga health and care staff.
Ini nga vaccination program amo ang turning point sa away sang United Kingdom batok sa COVID-19 kun sa diin masobra na sa 1.7 million ang narekord sa ila nga pungsod.
