Ipasaka na subong nga adlaw, Agusto 13 ang kaso nga murder batok sa magpakaisa nga nagpatay sa ginapahayag myembro sang LGBTQ community sa Barangay Nabitasan, La Paz, Iloilo City.
Ang biktima amo si Johnny Tan, 59, residente sang Yulo Arroyo, Iloilo City Proper.
Samtang ang mga suspek naman amo sanday John Paul Dubria, 20, kag Tammy Banesio, 18, lunsay residente sang Valderama, Antique.
Una na gin-ako sang magpakaisa nga matapos ang ila nga “one night stand” nagpamalibad magbayad ang biktima rason nga ginpatay nila ini.
Sa interview sang Bombo Radyo kay Police Staff Sergeant Antonio Santibañez, imbestigador sang Lapaz Police Station, iya ginpahayag nga napamatud-an sa imbestigasyon nga hungod nga ginpatay ang biktima.
Suno kay Santibañez, natapos na ang pila ka mga affidavit para sa kaso kag ginahulat na lang nga mahitso ang iban pa nga dokumento.
Dugang pa sang pulis, gina-ako sa gihapon sang duha ka suspek nga ‘one night stand’ ang ginhalinan sang hangkatanay nila sang biktima sang patyanay.
Nahibaluan nga gin-gulgul ang liog, kag ginbuno ang dughan sang biktima.
Samtang, santo sa isa ka taxi driver nga nagapuyo malapit sa gintabuan sang krimen, nagkinagual ang mga tawo matapos nahibaluan nga nabun-an ang biktima nga si Johnny Tan nga ila man ginatawag sa alyas nga ‘agi’.
Sa interview sang Bombo Radyo kay alyas Dado, residente sang Barangay Nabitasan, La Paz, Iloilo City, iya ginpahayag nga kada hapon man lang kun magpadulong si Tan sa ila lugar sa diin mahilig ini magtatap sa mga layaw nga ido kag kuring.
Suno kay Dado, mabuot man ang iya pagkilala sa mga suspek apang masami ang mga ini nagahingyo kay Tan nga pasudlon sa trabaho.
Wala man sang ihibalo ang natungdan angot sa relasyon sang mga suspek kay Tan kag kun ano ang kamatuoran sa likod sang ila nga ‘one night stand’.
