Indi dapat magpadala sa init sang ulo ang mga public officers ilabi na ang mga nagabantay sa quarantine control points subong nga panahon sang pandemya.
Ini ang may kaangtanan sa natabo sa Barangay 156, Tondo, Manila sa diin naluthangan-patay sang Barangay Kagawad ang isa ka quarantine violator nga may mental illness.
Sa interview sang Bombo Radyo kay Atty. Charl Stuyver Moleño, iya ginpahayag nga kun may yara man sang nagalapas sa ordinansa sang isa ka local government unit (LGU) may kaangtanan sa public health standards, una anay ini hatagan sang verbal warning antes hatagan sang citation ticket ukon presohon kun indi gid magpati.
Apang kun may yara sang mental illness ang quarantine violator kaangay sa natabo sa Tondo, dako nga konsiderasyon ang dapat nga ginhimo sang barangay tanod bangud mas makahangop ini.
Bisan diin ibutang suno kay Atty. Moleño, sala gid nga tiruhon ang isa ka quarantine violator apang nakadepende ini sa sitwasyon ukon gingamit lamang bilang self defense.
Una na nga ginpahayag sang Department of the Interior and Local Government (DILG) nga ang mga barangay tanods kag iban pa nga myembro sang ginatawag nga “police auxiliary units” ang wala ginapahanugutan sa idalom sang layi nga magdala sang armas ilabi na kadungan sang ila nga trabaho.
