Indi pa ma-implementar ang 100 percent capacity sa mga sakayanon nga nagabyahe Iloilo-Guimaras vice versa.
Nahibaluan nga kun yara sa idalom sang Alert Level 1 status ang isa ka lugar, ginapahanugutan na ang 100% capacity sa transportasyon.
Sa interview sang Bombo Radyo kay Buenavista, Guimaras Mayor Eugene Reyes, iya ginpahayag nga indi pa mapatuman ang 100 percent capacity sa mga sakayanon bangud wala pa sang mandu nga nabaton ang mga local Philippine Coast Guard (PCG) officers nagikan sa ila national office.
Suno sa alkalde, nakahatag naman sang instruction pinaagi sa memorandum ang Maritime Industry Authority (MARINA) Region 6 sa PCG nga i-implementar ang amo nga pagsulundan.
Liwat man suno sa iya magapatigayon sang hinun-anon ang Marina kaupod ang pila ka mga opisyal sang PCG agud nga mapatuman na ang 100 percent capacity sa mga sakayanon.
Dugang pa niya, kinahanglan man nga mag 100 percent na ang insurance policy sang tagsa ka motorbangka kun ma-implementar na ang 100% capacity.
Sa pihak sini, gin-aprubahan naman sang Marina suno sa alkalde ang P50 nga plete sa mga nagabyahe nga sakayanon Iloilo-Guimaras vice versa.
Nagpasa man sang petisyon ang mga drivers sang mga motorbangka nga ibalik na sa P50 ang plete bangud sila man ang apektado sa padayon nga pagsaka sa presyo sang gatong sa pungsod.
9 AV OF MAYOR EUGENE REYES
sa kaangot nga balita
Gin-athag naman ni Philippine Coast Guard (PCG) Iloilo Commander Edizon Diaz nga sila ang nagasunod lang sa mga guidelines ukon pagsulundan nga ginapagwa sang MARINA.
Suno kay Diaz, base sa ulihi nga guidelines naghalin sa MARINA, yara pa lang sa 70% ang ginapahanugutan nga capacity sa mga sakayanon nagabyahe Iloilo-Guimaras vice versa.
Ang MARINA suno sa natungdan ang nagapapanaug sang advisory kag ang buhaton lang sang Philippine Coast Guard amo nga i-enforce kag i-supervise ang ini nga mga pagsunlundan ukon polisa.
