ILOILO CITY – Nagpatigayon sang strike ang mga nurses sa Australia kag naga-demand sang mas maayo nga kondisyon matapos ang tatlo ka tuig nga pagpanguna sa pagpakigbato sa COVID-19 crisis.
Ang 24-oras nga strike ang ikatatlo na ang statewide walkout sang mga nurses kag midwives subong nga tuig nga nagresulta sang tension sa tunga sang essential workers kag sang gobyerno sang New South Wales.
Gin-piang sang train drivers ang rail network sang Sydney sang nagliligad nga mga semana samtang ang mga bus drivers kag manunudlo sa state ang nagprotesta man bangud sang industrial disputes.
Sa gwa sang Westmead Hospital sa Sydney, nagporma sang picket line ang madamo nga medical workers kag nagasinggitan sa tagsa ka driver nga nagalabay nga nagabusina man sang ila salakyan bilang pagpakita sang suporta.
Ang unyon ang nagpanawagan na sang legally-enforced ratio sang pasyente kag nurses.
Suno kay Michael Whaites, assistant general secretary sang New South Wales Nurses and Midwives Association, ang mga pasyente ang nagahulat tubtob 110 ka oras bangud wala sang bastante nga numero sang hospital beds.
Bangud sini, indi na maka-agwanta ang mga nurses.
Sa tion sang COVID-19 pandemic, ang istrikto nga pagsulundan ang ginalantaw nga rason kun ngaa nga napabilin sang Australia ang manubo nga death rates kun ikumpara sa iban pa nga mga manggaranon nga pungsod.
Apang subong nga tuig, ang numero sang kaso ang nagtimbuok kag nagpabudlay sang health system.
