Pasado na sa New York state bar examination si Kei Komoru, ang bana sang former princess sang Japan nga si Mako.
Nakuha sang 31-anyos nga si Kei ang kadalag-an sa amo nga pasinawan matapos nga nag-retake sang Hulyo kasunod sang iya duha ka beses nga kapaslawan nga makapasar.
Antes sini, nagatrabaho si Kei bilang isa ka law clerk sa isa ka legal firm sa New York matapos nag-graduate sa Fordham University’s law school nga may Juris Doctor degree sang May 2021.
Halin sang katapusan sang 2021, magkaupod na sila ni Mako nga nagapuyo sa Estados Unidos.
Si Mako amo ang 30-anyos nga hinablos ni Emperor Naruhito sang Japan.
Nagpakasal sila sang Oktubre sang nagligad nga tuig apisar sang pagpakamalaot nga nabaton bangud prinsesa si Mako, apang commoner lamang si Kei nga may kontrobersyal pa nga problema sa kuwarta sang amo nga tion.
Sang tion nga nagpakasal sila nga duha, gintalikdan ni Mako ang iya nga royal status sa Japan. Ini bangud sandig sa 1947 Imperial Household Law, required ang female royals nga i-give up ang ila nga status kun magpamana sila sang commoners.
Matunog anay ang espekulasyon kun masarangan ni Kei nga saguron si Mako bangud gina-kwestyon man kun pila ayhan ang income sini bilang isa ka abogado.
Ginapaanggid man ang duha sa masterpiece ni William Shakespeare nga Romeo and Juliet bangud sa pinasahi nga love story. ##
