ILOILO CITY – Ginaduso sang kaalyado ni Russian President Vladimir Putin nga i-ban ang mga aktibidad sang International Criminal Court matapos nga nagpagwa ang korte sang arrest warrant para sa presidente nga naga-akusar sa iya sang war crimes.
Suno kay Russian parliament speaker Vyacheslav Volodin, dapat nga amyendaran ang layi sang Russia agud nga madumili-an ang anuman nga aktibidad sang International Criminal Court sa Russia kag hatagan sang penalidad ang sin-o man nga maghatag sang suporta kag bulig sa korte.
Pahayag niya, ang Estados Unidos ang nagduso sang layi nga nagapamalabag sa iya mga citizens nga ipaidalom sa trial sang the Hague court.
Kung madumduman, nagpapanaog sang arrest warrant ang International Criminal Court nga naga-akusar kay Putin sang mga war crimes nga gina-alegar pag-deport sang ginatos ka mga kabataan nagikan sa Ukraine.
Una naman nga nagpaandam ang Russian officials nga sa tion nga may magtuyo nga mag-aresto kay Putin, nagakahulugan ini sang declaration of war batuk sa world’s largest nuclear power.
Ang mga dalagko nga pungsod kaangay sang Russia, Estados Unidos kag China ang indi kabahin sang International Criminal Court.
Ang Ukraine ang indi man myembro sang International Criminal Court apisar nga ang Kyiv ang naghatag sang jurisdiction nga mag-prosecute sang mga krimen nga nahimo sa iya nasakupan.
