Nagbiyahe na padulong sa Estados Unidos sang Amerika si President Ferdinand “Bongbong” Marcos Jr. para sa official visit nga magalawig tubtub sa Hulyo 22.
Natalana nga makigkita si Marcos kay U.S. President Donald J. Trump sa White House para nga mapabakod pa ang bilateral cooperation sa importante nga mga area kaangay sang economic growth, trade kag regional security.
Suno sa Presidential Communication Office (PCO), ang nagapanguna sa prayoridad sa byahe ni Marcos amo ang gin-anunsyo sang US nga 20% nga taripa sa mga exports sang Pilipinas.
Sa iya departure speech, ginpahayag sang presidente nga ang iya high-level meeting kay Trump amo ang una nga pagbisita sang head of state nagikan sa Association of Southeast Asian Nations (ASEAN) sa Estados Unidos.
“My meeting with President Trump is essential to continuing and to advance our national interest and strengthening our alliance,” pahayag sang chief executive.
Dugang sini, siya kag ang iya team ang magatinguha nga makig-negosyar agud mahagan-hagan ang epekto sang taripa sa Pilipinas.
“I intend to convey to President Trump and his Cabinet officials that the Philippines is ready to negotiate a bilateral trade deal that will ensure strong, mutually beneficial and future-oriented collaborations,” kabahin pa sang iya nga departure statement.
Ginpahayag man sang punong ehekutibo nga didto na sa Estados Unidos ang mga miyembro sang Philippine defense and economic teams para nga magpreparar sa mga diskusyon nga ini.
Magluwas kay Trump, makigkita man si Marcos sa American business leaders agud maganyat sila nga mag-invest diri sa pungsod.
Samtang yara sa luwas sang pungsod ang chief executive, mangin caretaker sa Pilipinas sanday Executive Secretary Lucas Bersamin, Justice Secretary Jesus Crispin Remulla kag Agrarian Reform Secretary Conrado Estrella III.#
