Ginkumpirma sang Malacañang nga nag-resign si Justice Undersecretary Jose “Jojo” Ragus Cadiz Jr. kasunod sang alegasyon sang involvement sa kurapsyon nga naangot sa maanomaliya nga flood control projects.
Gin-anunsyo ini ni Palace Press Officer Claire Castro sa press briefing subong nga aga, Disyembre 5.
Natalana pa nga ihatag ang dugang nga mga impormasyon kun ginbaton bala ni President Ferdinand Marcos Jr. ang iya nga resignation.
Matandaan nga sa isa ka nine-minute video ni resigned Ako Bicol representative kag former House appropriations committee chair Zaldy Co, gin-akusahan sini si Cadiz nga amo ang naga-akto nga bagman para kay President Marcos.
Gin-alegar ni Co nga sang Nobyembre 2024, kadungan sang budget deliberations, nagtambong siya sa meeting kaupod kay anay House speaker Martin Romualdez kun sa diin yara man si Cadiz.
Suno kay Co, ginhambalan siya ni Cadiz nga tuman ka akig si Marcos bangud sang missing “remittances.”
Base sa alegasyon ni Co, ginmanduan siya nga magdul-ong sang P1 billion kay Marcos. Gin-alegar sini nga ang nag-instruct sa iya amo si Romualdez nga dal-an ang cash sa 30 Tamarind Street, South Forbes Park para ma-turn over sa president.
Matandaan nga naglutaw man anay ang pangalan ni Cadiz nga amo ang potensyal nga magbulos kay anay Justice Secretary Jesus Crispin “Boying” Remulla nga amo na subong ang Ombudsman.
Sang naglutaw naman ang kontrobersiya sang ginaalegar nga kurapsyon, nagpahayag ang DOJ nga indi sila mag-imbestigar kay Cadiz bangud ang may awtoridad nga maghimo sini amo ang Ombudsman.
