Aprubado na sang Senado sa third and final reading ang hagna nga nagahatag sang emergency powers kay President Ferdinand “Bongbong” Marcos, Jr. nga magsuspinde ukon magbuhin sang excise tax sa produktong petrolyo.
Nakalusot sa Senado ang Senate Bill No. 1982 matapos nakakuha sang 17 ka affirmative votes, wala sang negative votes, kag wala sang abstentions.
Sa idalom sini nga hagna, may gahum ang presidente nga mag-suspend ukon magbuhin sang excise tax pananglitan maglapaw na sa $80 per barrel ang presyo sang Dubai crude oil.
Sa interpellation, ginklaro naman sang nag-sponsor sang hagna nga si Senator Pia Cayetano nga indi pa gilayon mabatyagan sang publiko ang epekto sang tax suspension.
Ini bangud kun mapasar na bilang layi kag i-execute na ang buhin ukon suspension sang buwis, dapat nga ubuson anay sang mga kumpaniya sang langis ang ila nga existing inventories nga nabakal nga may taxed rates.
Bangud sini, posible nga 30-45 ka adlaw pa antes mag-reflect ang tax suspension ukon mas mas madali naman kun maubos na ang suplay subong.
Kun maubos naman ang daan nga stocks, diri na kag maganubo ang presyo sang gasolina sang tubtub sa P11.2 per liter, samtang mabuhinan naman ang presyo sang diesel sang tubtub sa P6.72 per liter.
Matandaan nga sang Lunes sang gin-aprubahan man sa third and final reading sa Kamara ang kaangay nga hagna matapos nga gin-certify ini sang presidente bilang urgent.
Subong nga adlaw, Marso 18, dapat nga ma-ratify na sang Kamara kag Senado ang amo nga hagna agud nga ma-consolidate ukon masibo ang ila tagsa ka mga bersyon para nga mapasa na sa presidente para nga mapirmahan sini.
Subong man ang katapusan nga adlaw sang Kamara kag Senado antes ang isa ka bulan nga congressional break para sa Semana Santa.
