Nagapangita sang paagi ang Department of Agriculture (DA) agud mapunggan ang sakit nga amo ang nangin balabag sa industriya sang saging sa Pilipinas.
Suno kay Agriculture Undersecretary Philip Young, isa sa ila ginatutukan subong amo ang pagbulig sa mga mangunguma sang saging nga naapektuhan sang Panama disease ukon Fusarium wilt nga yara na sa industriya sulod sang halos 20 ka tuig.
Ginpahayag ni Young nga bangud sini, nagnubo ang pwesto sang Pilipinas sang 2024 halin sa ikaduha panubo sa ikaapat bilang pinakadaku nga exporter sang saging sa kalibutan.
Agud masolbar ini, nagaplano ang DA nga magkoordinar sa isa ka kumpanya nga nakabase sa Singapore para sa pagtilaw sang bag-o nga teknolohiya nga mahimo makabulig sa pagtapna sang sakit sa saging.
Ginalauman nga mapirmahan ang memorandum of understanding ukon MOU sini nga bulan.
Magatukod man sang trial farm para sa saging kag manga nga pangunahan sang Bureau of Plant Industry.
Suno sa United Nations Food and Agriculture Organization ukon FAO, nakabawi ang Pilipinas kag nakabalik sa ikaduha nga pwesto sang 2025 bilang pinakadaku nga exporter sang saging sa nagligad nga tuig.
Sa pihak sini, ginpabutyag man ni Young nga indi lang produksiyon ang kinahanglan tutukan. Kinahanglan man suno sa iya nga mapasangkad ang merkado sang mga produkto kag mapakusog ang kompetisyon sang Pilipinas sa guwa sang pungsod, lakip na ang pagsolbar sa mga isyu sa taripa.
Nahibaluan nga base sa FAO, nagsaka ang total banana exports sang Pilipinas sang 2025 sang 25.6 percent year-on-year pa-2.93 million metric tons.
