Ginalauman nga madala ni President Ferdinand “Bongbong” Marcos Jr. ang Senate resolution nga nagapamatok sa incursions sang China sa West Philippine Sea sa iya nga state visit sa Beijing sa masunod nga tuig.
Kasunod ini sang pagpasar sang Senado sang resolution nga naga-pakamalaot sa bullying nga ginahimo sang China sa West Philippine Sea.
May kaangtanan ini sa natabo nga insidente sang Nobyembre kun sa diin ginpilit nga kuhaon sang Chinese coast guard ang rocket debris nga na-retrieve sang Philippine Navy.
Ginpanginwala sang Chinese embassy ang insidente, kag ginpahayag nga may “mainabyanon nga konsultasyon” nga ginhimo sa amo nga debris.
Apang base sa footage nga ginpresentar ni Senator Francis Tolentino sa session sa senado, nabatian pa ang Philippine Navy personnel nga nagasiling nga gin-utod sang Chinese navy ang higot kag ginkuha ang debris kag wala naman sang nahimo ang Philippine navy bangud mahina ang ila nga rubber boat.
Sunod nga nagpadala ang Department of Foreign Affairs sang note verbale sa China agud mangayo sang clarification sa amo nga incident.
Sa Enero 2023 naman natalana ang state visit ni Marcos sa China kasunod sang imbitasyon mismo ni Chinese President Xi Jinping.
Una naman nga ginpahayag ni Marcos sa summit sa Belgium nga may yara sang strong position ang Association of Southeast Asian Nations sa pag-negotiate sa issues sa West Philippine Sea bangud sa “strategic support” halin sa European Union. ##
