ILOILO CITY – Ginakalipay sang Department of Health nga wala sang panibag-o nga kaso sang Coronavirus Disease 2019 (COVID-19) sa Western Visayas.
Sa interview sang Bombo Radyo kay Dr. Mary Ann Sta. Lucia, cluster head sang Health Promotion sang Department of Health 6, iya ginpahayag nga lunsay nagnegatibo ang 136 ka laboratory result nga ginpaguwa sang Western Visayas Medical Center as of April 26.
Suno kay Sta. Lucia, nagapabilin sa 62 ang COVID-19 cases, 24 sa gihapon ang naka recover kag siyam ang patay.
Ginpahayag ni Sta. Lucia nga isa ka maayo nga balita nga wala sang panibag-o nga kaso sang COVID-19 sa rehiyon.
Kun pahat-pahaton, anum ang na record sa Aklan, 11 sa Antique, lima sa Capiz, 20 sa Iloilo, apat sa Negros Occidental, siyam sa Bacolod City, pito sa Iloilo City kag COVID-19 free sa gihapon ang Guimaras.
Sa nasambit nga data, wala pa sang official statement ang ahensya tuhoy sa kumpirmasyon ni Iloilo City Mayor Jerry Treñas nga may isa ka personnel sang Iloilo City Emergency Responders nga nagpositibo sa nasambit nga virus.
