ILOILO CITY – Magahatag sang bulig ang Police Regional Office 6 sa Iloilo City Police Office may kaangtanan sa pagpatigayon sang security measures kadungan sang Dinagyang Festival 2020.
Sa interview sang Bombo Radyo kay Police Brigadier General Rene Pamuspusan, Director sang Police Regional Office 6, iya ginpromisa nga magpalab-ot sang bulig ilabi na kun logistics kag personnel ang pagahambalan.
Suno kay Pamuspusan, sa subong, yara sa Aklan ang augmentation force agud nga magbulig sa pagbantay sang seguridad sa Ati-Atihan Festival.
Ginpahayag ni Pamuspusan nga kasubong sa Ati-Atihan, may yara man sang augmentation force ang Police Regional Office 6 nga amo ang magabulig sa mga personnel sang Iloilo City Police Office kadungan sang Dinagyang Festival.
Target sang Police Regional Office 6 ang zero Dinagyang-related incident.
Maga-umpisa sa Enero 23 ang deployment sang police personnel sang Iloilo City Police Office kaupod ang augmentation force bilang pagpanghanda sa Dinagyang Festival 2020.
Sa interview sang Bombo Radyo kay Iloilo City Police Office Director Police Col. Martin Defensor Jr., iya ginpahayag nga 3,000 personnel ang ila ginhingyo gikan sa Iloilo Police Provincial Office kag Police Regional Office 6.
Kadungan sang pag-umpisa sang deployment, ginahandaan man nila ang pagagamiton nga radio sets para sa komunikasyon bangud nga may yara sang signal shutdown.
May yara sang iga set-up nga operational command para sa madasig nga information dessimination sa tunga sang mga ahensya sang gobyerno.
